ذكاء سيدة LamiaaShaheen

ذكاء سيده

ازاي موكلتي انتقمت من طليقها وخسرته كل حاجة عملها طول حياته؟؟ "الكوين"

يقول صاحب القصة:

أنا محامي طلاق في شيكاغو.. السنة اللي فاتت كان عندي قضية خلتني أسأل ازاي الإنسان يتحول من قمة الوفاء لقمة الانتقام!!

بس مش ده الغريب.. الغريب فعلًا إن الزوجة كانت عارفه.. ايوه عرفت من سنتين ونص من التلات سنين.. عرفت من خلال ايصالات شركات بطاقات الائتمان.. اللي كان بينسى يخبيها.. والي بتوضح الفلوس اللي كان بيدفعها في الفنادق.. محلات المجوهرات.. المطاعم.. واللي كلها هي متعرفش عنها أي حاجة والا سبق راحتها..

بدل ما تواجهه بدأت تخطط..

أول حاجة.. لقت وظيفة.. قالت له إنه الولاد كبروا وهي عايزه حاجة تضيع فيها وقتها.. هو شجعها طبعًا عشان تنزل من على دماغه شوية ويلاقي وقت أكتر يخلبص فيه..

تاني خطوة.. فتحت حساب بنكي باسمها.. حوشت فيه كل بنس بيدخلها من شغلها.. وهو عمره ما سأل بتقبض كام لأنه كان مفترض إنها شغاله أي حاجة مش بتديها مرتب كبير طبعًا بالمقارنة بمرتبة اللي من 6 أرقام..

تالت خطوة.. بدأت توثق كل حاجة.. مش بطريقة واضحة.. لا هي بس كانت بتصور وبتحط التواريخ على الصور.. كل حدث.. كل عيد ميلاد.. كل تجمع عائلي..

اللي هو ماكنش عارفه إنها بتبني ملف أدلة يثبت إنه ماكنش موجود في حياتهم.. والتواريخ على الصور اثبتت إنه غاب عن 73% من مباريات البيسبول بتاعة ابنه.. وغاب عن 80% من اجتماعات أولياء

الأمور في المدرسة..

رابع خطوة.. بقت تشجع العلاقة بتاعته.. طبعًا مش بطريقة مباشرة.. بس هي بقت تقترح عليه إنه يروح يتمرن ع الجولف أكتر.. وكانت بتبقى عارفه إنه مع عشيقته..

كانت بتصر إنه محتاج يرتاح ويفك ضغط الشغل من عليه.. ويسافر في اجازات نهاية الأسبوع.. وحتى اشترت له الكولونيا اللي شمتها عليه واللي أكيد كانت صاحبته جيباها في عيد الميلاد..

خامس خطوة.. لما عرفت إن عشيقة جوزها صغيرة في السن.. وبتشتغل في نفس الشركة مع جوزها.. وبشوية بحث صغيرين على حساباتها ع النت اكتشفت إنها مدمنة تسوق.. وعليها ديون على بطاقة الائتمان.. وذوقها دايمًا في الحاجات الغالية..

ف الزوجة بدأت تسيب كتالوجات السلع الغالية من هدوم وشنط ومجوهرات في كل حته في البيت.. وده عشان كانت متأكده إن جوزها هيلاقيها وأكيد بما إنه عايز يبهرها ف هيشتري لها من الكتالوجات دي.. وبالفعل وقع في الفخ وبقى يشتري حاجات لدرجة إنه تقريبًا استنزف كل مدخراته الشخصية..

سادس خطوة.. لما اقنعته إنها تعمل تعديلات في البيت عشان يبقى استثمار للمستقبل.. واثناء ما كان مشغول في كتابة الرسايل لعشيقته خلته يمضي لها على موافقة على إنها تعمل التعديلات في البيت..

وماكنش عارف إنه هو مضى على تنازل بقيمة 70% من البيت.. ودي كانت نفس القيمة اللي كانت دفعتها من ميراثها في البيت لما اشتروه..

اليوم اللي قدمت فيه على ورق الطلاق عملت 3 حاجات..

• أولًا: بعتت

ورق الطلاق على مكتبه في شغله.. قدام عشيقته.

• ثانيًا: وقفت الحساب المشترك اللي كان بينها وبينه بسبب ثغرة لقيتها في الورق..

• ثالثًا: في حد "مجهول" بعت للأتش ار في الشركة عند جوزها شكوى  بتحصل بين المديرين والمساعدات.. وبعتت صور وأدلة..

لكن كل ده ماكنش مهم قدام الانتقام الحقيقي.. لأن الزوجة كانت على تواصل مع حبيب المساعدة السابق.. واللي سابته عشان علاقتها بطليق الموكلة.. وكانت هو كمان قبل ما تنفصل عنه.. الزوجة بعتت له سكرينات كانت واخداها من تعليقات صاحبته على السوشال ميديا إن صاحبها الجديد غني وبيشتري لها حاجات غالية..

مش بس كده دي كمان كان معاها سكرينات بتعليقات لعشيقة جوزها إنها خلاص قربت تقنعه يطلق مراته ويرميها والبيت يبقى بتاعها لوحدها بعد ما الست "المقرفة" دي تطرد..

وبشكل من الأشكال قدرنا ندخل الاسكرينات دي في قضية الطلاق..

الزوج  خسر شغله بعد ما الأتش أر عملوا تحقيق داخلي ونتج عنه إنهم طردوه من الشغل..

في نفس اليوم عشيقته سابته.. لأن الر جاله اللي من غير شغل ماكنوش على ذوقها..

الزوج حاول يرفع قضية إنه مستحق للنفقة بعد ما اتطرد.. بس احنا قدرنا بفضل الزوجة نقدم أدلة إن بقاله 3 سنين بيصرف من مدخراته على العلاقة اللي كان فيها..

أسوء ما في الموضوع إن ابنهم اللي عنده 16 سنه وقف قدام القاضي وشهد ضد أبوه.. الأم ماكنتش محتاجه تدربه أو تقوله يقول ايه.. هو بس الولد وقف

واتكلم عن كل الأوقات اللي أبوه ماكنش موجود فيها.. كل الوعود اللي وعدهاله وموفاش بيها.. كل المباريات الي محضرهاش عشان يشجعه.. اتضح إن الولد كان مركز وحاسب كل حاجة بتحصل..

النتيجة النهائية.. الزوجة أخدت البيت.. أخدت الحضانة بتاعة الأولاد.. مش مطلوب منها تدفع للزوج نفقة..

الزوج اتنقل وراح يعيش مع أبوه وأمه.. وهو سنه 47 سنه.. الملف بتاع لينكد إن بتاعه لسه مكتوب فيه إنه بيشتغل مدير عام.. بس هو في الواقع بقى يشتغل في توصيل الأكل تبع واحدة مش شركات الطلبات أون لاين..

العشيقة اتجوزت واحد شغال في العملات الرقمية بعد 6 شهور بس من وقت نهاية العلاقة..

في الكريسمس الزوجة بعتت لطليقها كارت معايدة... كان جواه صورة من فرحهم وعليها 5 كلمات بس "انت اللي عملت كده فنفسك"

الحقيقة إن دي القضية الوحيدة اللي كسبتها ومكانش عندي أي تعاطف مع الخسران.. الزوج كان عنده 3 سنين كاملين عشان يختار عيلته.. بس هو فضل عليهم علاقة متسواش..

الزوجة بدأت مجموعة دعم للستات اللي بيمروا بنفس الوضع.. أول اجتماع لها كان فيه 3 ستات بس في الحضور.. دلوقتي الأعداد زادت لدرجة إنها بقت تأجر قاعات كاملة في الفنادق عشان الحضور كبر..

الزوجة بتعلم الزوجات اللي اتخانوا يعملوا ايه بالظبط.. خطوة بخطوة.. بتقدم لهم دعم قانوني ومعنوي ومادي أحيانًا..

لسه فاكر الجملة اللي قالتهالي وقررت أحطها في إطار صورة على مكتبي لحد انهارده "هو علمني

الصبر.. وانا علمته يتحمل نتايج تصرفاته"

#احاديث_تيكتوكيه

#LamiaaShaheen