العروسة ناريمان شهيرة عبد الحميد
ناريمان صحبتي عروسة جديدة اتجوزت من أسبوع واحد بس
واحنا عادتنا كـ بنات بنسيب لبعض مساحة في بداية الزواج من باب الأدب والذوق
لكن لقيت ناريمان هي الـ بعتالي بعد حوالي أربع أو خمس أيام من فرحها
وبتقولي شهيرة
كنت سعيدة جدًا أنها بعتتلي علشان اطمن عليها ولاني مفتقداها جدًا رغم أن مدة غيابها عني مش كبيرة
رديت من فرحتي قولتلها صباحية مباركة يا عروسة
لكنها ردت عليا بشكل وقع قلبي لما قالت عروسة إيه أنا في كارثة
كارثة إيه الـ ممكن تحصل لعروسة في أول أسبوع من جوازها
مفاتش دقيقة ولقيت ناريمان باعتة صورة
دي كارثة
واكيد كارثة كبيرة
رديت وانا حرفياً صوابع أيدي مفيهاش اعصاب وقولتلها إيه ده
كنت في حالة ذهول وسكوت
مش قادرة افهم شئ وخايفة وقلبي مقبوض
بقالي فترة كبيرة بشوف كوارث على الانترنت لحالات قتل كتير بين الأزواج وحاجة في قمة الرعب
لكن عمري ما تخيلت إني هشوف ده في صحابي
وخصوصًا ناريمان
الـ قصة حبها هي وعبد العظيم معروفة في الشلة من سنين
فات شوية وقت عقلي فيهم بينفجر من التفكير ومليون سيناريو جوا دماغي كلهم
ردت ناريمان عليا فويس وصوتها مكتوم وحزين بشكل يقهر وقالت انـ انــا مشـ مش فاهمة حاجة يا شهيرة من يوم ما دخلت بيتي وكل حاجة مرعبة وغريبة حتى عبد العظيم الـ حبيته مش هو ده الـ معايا في الشقة دلوقتي
حسيت أن الكلام مش هينفع شات وجريت طلعت رقمها واتصلت عليها أربع مرات ورا بعض بتكنسل عليا
رجعت بعتلها واتس من تاني ناريمان طب ردي عليا خليني أفهم فيكي إيه وايه الـ بيحصل
وللأسف قفلت نت
ولما اتصلت كانت قفلت تليفونها كمان
خلاص أعصابي مش قادرة اتحمل قلقي عليها
واتصلت على وردة اخت ناريمان يمكن عندها معلومات اكتر تطمني بيها
الو يا وردة أنا شهيرة هي ناريمان كويسة
=ايوا الحمد لله زي الفل
بس دي كلمتني وصوتها مش كويس انتي متأكدة
=والله كويسة ياشهيرة دي أختي ثم سيبك من هرموناتها انتي عارفة ناريمان دارمية اوفر يعني الله يكون في عون زيزو معاها
قفلت معاها وانا مش قادرة اشرحلها الـ ناريمان قالتهولي
خوفت افشي سر صحبتي يمكن خفياه عن أهلها
فضلت قاعدة طول اليوم قلقانة والتوتر باين عليا
لحد ما جالي اتصال من ناريمان أخيراً
ناريمان انتي كويسة حرام عليكي بموت من القلق عليكي
=أنا مش كويسة يا شهيرة عايزة حد جنبي وخايفة
طب ينفع اجيلك بكرا
=ياريت عبد العظيم خلاص نازل شغله الصبح بدري أول ما ينزل تعالي بسرعة
حاضر من النجمة هتلاقيني جنبك بس حاولي تهدي ومتقفليش تليفونك تاني
النوم طار من عيوني طول الليل بسبب التفكير في أزمة صحبتي والكارثة الـ لسه معرفش تفاصيلها
انتظرت الساعة عشرة الصبح ونزلت روحتلها
اتصلت عليها كذا مرة وانا تحت العمارة مردتش عليا
كنت خايفة أطلع الاقي جوزها لسه منزلش واتحرج
وده نظرًا أنه لا بيطيقني ولا بطيقه عمومًا من فترة الخطوبة
فضلت واقفة على جنب في الشارع لحد ما لقيت عبد العظيم خارج من العمارة مستعجل وركب المكنة بتاعته ومشي
كنت مركزة معاه من أول ثانية خرج فيها
وحسيت بتغيير غريب فيه
عبد العظيم جسمه اتغير وشكله
بقا تخين وعريض أو عمومًا هو متغير مش عبد العظيم بتاع الخطوبة المسلوع الـ كنا بنشوفه
طلعت بسرعة لناريمان الـ فتحتلي الباب واتصدمت بمنظرها
ناريمان زهرة شلتنا وأجمل ما فينا عيونها كلها سواد ووشها أصفر ومسحوب كأنها
اول ما شوفتها حضنتها
وبدأت تبكي بأنهيار وجسمها كله بيترعش
مش قادرة افهم الـ فيها
لكن حالة ناريمان بتقول أن في كارثة كبيرة
بعد ما بدأت ناريمان تهدا
بدأت تحكي لي بضعف وقالتلي البيت ده وحش يا شهيرة اوي عايزة ارجع بيت أهلي أنا كنت غلطانة في اختيار عبد العظيم ده شيطان مش طبيعي
كلامها كله مبهم
سألتها أنا لما شوفته وهو خارج من العمارة شكله كان غريب انتي حسيتي ب ده
هزت راسها وقالتلي الحمد لله أنك خدتي بالك علشان تتأكدي أن عبد العظيم اتبدل ومش هو ده الشخص الـ حبيته طول الخطوبة أنا عايشة مع شيطان يا شهيرة مستوعبة كلامي
حاولت اوصلها إني مصدقاها بكل الطرق
ولما اطمنت بدأت تحكي تفاصيل اكتر وقالتلي من أول يوم جواز عبد العظيم كان بيضحك كتير ضحك هستيري مش طبيعي خوفني منه وحسيت أنه مجنون أو ملبوس مش عارفة بيقعد يغني في الحمام بصوت عالي جداً وبيتأخر كتير يمكن اول يوم قعد ساعتين في الحمام على الحال ده
عديت اول يوم يمكن بنتأقلم على أسلوب بعض من اول وجديد كمتزوجين
وتاني يوم كانت الكارثة يا شهيرة
دخلت اوضتي
مع أنها امبارح ماكنتش كده
